Nujuartat neqaat siallugit panertoorsinnaapput, tamannali pinngitsoorneqarsinnaavoq.

Igasut neqip aapaarluni aqitsuullunilu qalannissaa angoruttarpaat. Tamakkutoorlugu medium/rare. Siatsinermut kissarnissiut atussagukku qeqqata kissassusissaa 52-55-iussaaq.

Neqinut tamanut atuuppoq siareernerata kingorna minutsini 15-ni uninngassagami neqip issera neqimut akulerunniassammat. Pissutigalugu siullermik neqip issera syremik akoqarmat neqimik aqinnerulersitsisumik, aappassaanillu neqip issera tamarmi kuulluni nungussammat taamaallillunilu neqi panertillugu
.
Neqinut tamanut aamma atuuppoq taratsunik immaqalu qasilitsunik hvidløginillu tanillugu igalinnginnerani.

Aajuku tuttup neqaata siannissaanut najoqqutassat siatsilluni kissarnersiut atornagu.
Qimerluata neqqarinnera: Neqi siatsimmi orsupalittumi kajortiguk qaava qalippertillugu. Iffiorfimmi 200-nik kissassusilimmi minutsit 15-it missaanni siaguk.

Quttoraq ilivitsoq: Quttoraq ilivitsoq siassagukku tunnumik imaluunniit baconimik qallertariaqarpat panertoortikkusunngikkukku. Iffiorfimmi 230-nik kissassusilimmi minutsini 15-ini siaguk taava iffiorfiup kissassusia 180-imut sakkukilliuk siallugulu nal. ak. ataaseq minutsillu 15-it.

Quttoqqap ilamerngi: Quttoraq saaniiarukku aggorlugulu siatassat tallimat arfinillilluunniit missaaniilissapput. Siataq s.i. quttoqqap ilutaanit inunnut 6-8 missaannut naammattarpoq. Siannissaata sivisussusissaa qimerluup neqqarinnerata sianneratut sivisutigissaaq. (Qulaaniittoq takuuk)

Taleq (tuttup siulliia):
Taanna aqilisissagaanni sivisuumik siattariaqarpoq. Amerlanertigut iffiorfimmi siatsivimmut iikillugu naatitanik imermillu ilallugu sianneqartarpoq. Uanitsuusinnaapput umiatsiaasanngorlugit aggukkat, iipilit aggukkat imaluunniit hvidløgit ilivitsukaat. 10 dl-it missaanni imilerneqassaaq. Æblemost, immiaaraq imerlu akuleriillugit qajuliussinnaavatit. Qillaalasumik qallerlugu iffiorfimmi 160-nik kissassusilimmi sianneqassaaq nal. ak. 2½-3-ni aqilisillugu, neqitaallu saarnganiit peeriaannanngorlugu.
Siatap qaava qajuanik siannerani kuillattaarneqassaaq.

Leave a Reply